Ende pa nisur mirë aventurën, Skënder Gega është detyruar të largohet nga Arabia Saudite. Newsport.al mëson se trajneri tropojan në konsensus të plotë me drejtuesit e klubit Al Faisaly ka vendosur të kthehet pranë familjes në Shtetet e Bashkuara të Amerikës. Situata e krijuar nga virusi i frikshëm “Covid 19” ka paralizuar edhe botën e sportit në gjithë rruzullin.

I ndodhur në këto kushte, Gega e ka parë të udhës t’i bashkohet familjes së tij pasi në këtë kohë s’mund të flitet për futboll. Newsport.al mëson se drejtuesit e klubit e kanë mirëkuptuar dhe i kanë dhënë leje që të kthehet në USA. Edhe pse është mjaft e vështirë të udhëtosh në këtë periudhë për shkak të pezullimit të gjitha fluturimeve, Ambasadat Amerikane po tërheqin gjithë shtetasit e saj.

Klubi arab i ka plotësuar çdo lloj kushti Skënder Gegës. Ai ka qëndruar në një nga hotelet më të mira në vend, teksa të gjitha shpenzimet janë mbuluar nga drejtuesit e Al Faisaly. Momentalisht qeveria arabe ka vendosur karantinim 10-ditor të të gjithë vendit dhe pritet që ky afat të zgjatet dhe më tej.

Kësisoj Gega e ka parë të udhës të largohet për të udhëtuar pranë familjes së tij në Shtetet e Bashkuara të Amerikës. Por, sapo situate të përmirësohet, është i detyruar të rikthehet sërish në Arabi për të vijuar punën me skuadrën e Al Faisaly ashtu siç është e parashikuar në kontratën e nënshkruar.